Koldo Eleizalde lehiaketa 2019, bertsoa, 3. kategoria, sariduna.

BERGARAKO EUSKARAREN ERABILERARI JARRIAK

1) Ba al dakigu benetan zein den

   Bergararron izaera?

   kalera irten ta sumatzen da

   euskarak duen galera

   nire iritziz aldatu behar

   genuke gure jarrera

   horrela soilik igoko baita

   kaleko erabilera

2) Herritar askok daki euskaraz

   guztira hiru laurdenak

   ta gutxi gara egun guztian

   euskaraz ari garenak

   kalera irten eta erdaraz

   entzuten dira gehienak

   hau ikusita kolpetik nahastu

   egiten zaizkit barrenak

3) Korrika dator bi urterik behin

   ta indartzen da euskara

   egun hauetan oso euskaltzale

   bilakatzen da Bergara

   lekukoaren mezua dabil

   herrian hona ta hara

   baina antzerki handi bihurtzen

   denaren  lekuko gara

4) Ahobizien rol-ak hartuta

   euskaraldiko bidaian

   lan hori ondo egiten dugun

   jarriko nuke ezbaian

   belarriprestak gu entzuteko

   prest egoten dira mahaian

   baina erdara irteten zaigu

   hitz egiteko garaian

5) Ekimen hauek euskararentzat

   beti dira positibo

   baina kaleko erabilera

   horrela ere ezin igo

   "Euskaraz bizi nahi dut" kaletik

   entzun daitekeen  aldiro

   hipokresia zantzuak argi

   ikusten dira berriro

6) Guztia ez da kritika izango

   lagunak ditu euskerak

   gure hizkuntzan egiten dira

   talde askoren bilerak

   hauen artean dira gaztetxe,

   Jardun eta martxanterak

   horiek dira euskerak zinez

   behar dituen jarrerak