Mitxelenaren A.V.en arabera, Agure-z osatuak dira honakoak: Agureola (Agurola, Aburola), Agurolaeta. Kasu honetan hau genuke, beraz: Agure + ola + eta + gañekoa.

Amaierako A artikulua da. Beraz, lekuzko kasuetan, NON kasuan izan ezik, galdu egiten du A hori. Bestalde, hitzak lehendik -KO baduenez, NONGO kasuan ez da KO errepikatzen. Hala, beraz, honako hau da erabilera egokia: Agurlaetagañekoan bizi naiz, Agurlaetagañeko lagunak ditut, Gure ama Agurlaetagañekoa da, Agurlaetagañekotik etorri naiz, Agurlaetagañekora noa... Ostera, okerrak dira honelakoak: *Agurlaetagañekoako lagunak ditut, Gure aita *Agurlaetagañekokua da, *Agurlaetagañekoatik etorri naiz, *Agurlaetagañekoara noa

Felix Aranzabal (Angiozarko itsua) soinujole ezagunaren jaiotetxea. 1919an jaio zen Angiozarren eta 2006an hil zen Eibarren. Felixen iloba da Joxe Aranzabal kazetari, irakasle eta blogari arrasatearra.