Ez dago datu-basean, ezta oharretan ere, beste lekukotzarik. Katastrokoan hainbat lekukotasun daude bai ahozko eta bai idatzizko. Ahoz ia beti Gz agertzen da eta idatziz erdiak inguru Bz eta beste erdiak inguru Gz.

Mapa egitean hasiera batean Gaztañalde izena jarri genion zubi honi. Hala ere, Buruñaoko herritar batek hala adierazi zigun: "Gaztañaldeko zubia jarrita dagoenari guk Zubiberri deitzen diogu eta uste dut bertan ere badela halako errotuluren bat. Gaztañalde handik gertuko bidegurutzeari deitzen zaio. Zubizarra Ford aldetik saihesbidera doana da eta bestea Zubiberri."

Hala ere, bada auzoan beste jokabide bat: zubi honi Zubizarra deitzekoa eta Ford parekoari (1969-70 inguruan egina omen da) Zubiberrixa deitzekoa.

1923-88 bitarteko Udaleko aktetan sarritan agertzen da Zubiberri, batzuetan zona gisa eta beste batzuetan zubia bera ere bai. Ematen du batzuetan Gaztañaldeko zubia eta Zubiberri bat direla eta beste batzuetan bi 1923ko lekukotza batean honakoa hau dio eta: ""...BARRIO DE MUÑAO...EL PUENTE DENOMINADO GASTAÑALDE SITO EN EL CAMINO VECINAL QUE DEL PUENTE DE * CONDUCE A LA  CªDE MIACA..."" Izan liteke Gaztañalde paraje zabal samarra izatea eta bi zubiak harrapatzea ere.

Hala, beraz, lehenengo ekarpena aintzat hartuta, zubi honi Zubiberri eta tokiari Gaztañalde izena jartzea erabaki genuen.

Bergarako Hiri Ordenazioko Plan Orokorreko Katalogoan Murinondo izenez dator.