Inoiz Bergaran sortu den libururik mardulena izango da, beharbada, esku artean duzun hau, irakurle. Baina liburu hau ez da bakarrik mardula sendoeraz eta kanpo-itxuraz. Barruko mamina du, batez ere, ederra. Herriko euskara jaso eta zabaltzeko egiten dihardugun bidearen barruan, urrats sendoa izango da, duda barik, hiztegi hau herritarren eskuetan jartzea. Gure udalak joan zen urtean onartu zuen Euskara Biziberritzeko Plan Nagusia eta han lehentasun handienekotzat jo zen euskararen transmisioa bermatu eta sendotzea. Gaur egun Bergarako Udalak hainbat programa ditu ikastetxe, euskaltegi, euskara-elkarte eta abarrekin batera herriko ume, gazte zein helduen euskara hobetu eta aberastera bideratuak. Seguru nago esku artean dugun hiztegi eder hau lan horretan lagungarri bikaina izango dela.